Hidrogenoaren Euskal Korridoreak (BH2C) Connecting Hydrogen Europe 2026 nazioarteko konferentzian parte hartu du

Ekainaren 17an, Hidrogenoaren Euskal Korridoreak (BH2C) sektorearen Europako topaketa nagusietakotzat jotzen den Connecting Hydrogen Europe 2026 nazioarteko konferentzian parte hartu zuen. BH2Cren izenean, Leire Colomo Zuzendaritza Batzordeko kideak “Green Hydrogen in Action: Lessons from Leading Spanish Projects” delako mahai-inguruan hitz egin zuen, Moeve, DH2 Energy, Copenhagen Infrastructure Partners eta Hidrógeno Aragón Fundazioaren ordezkariekin batera.

Bilerak hidrogeno berriztagarriaren arloko Espainiako proiektu nagusietako batzuen sustatzaileak bildu zituen, proiektuen garapena, administrazio-izapidetzea, azpiegituren plangintza, finantzaketa eta merkatuaren sorrerari buruzko esperientzia praktikoak partekatzeko. Eztabaidan jorratutako alderdien artean, nabarmentzekoak dira behar bezalako elektrizitate-konexioa izatearen garrantzia, sarerako sarbide-kostuek proiektuen lehiakortasunean duten eragina eta berriztagarrien sorkuntza, azpiegitura eta eskariaren garapenean modu koordinatuan aurrera egiteko premia.

Bere hitzaldian, Leire Colomok ezagutzera eman zuen BH2Ck hidrogenoaren balio-kate osoa integratzen duen lankidetza-ekosistematzat duen ikuspegia, industriaren, zentro teknologikoen eta erakundeen arteko lankidetzaren garrantzia nabarmenduz, proiektuen hedapena bizkortu eta beharrezko industria-gaitasunak sortu ahal izateko.