BH2Ck hainbat ekimen aurkeztu ditu hidrogenoa portu-eremuan hedatzeari buruzko jardunaldi batean
Hidrogenoa egungo zein etorkizuneko energia-bektorea da, eta horren kariaz, Mugikortasun eta Logistika Klusterrak (MLC ITS Euskadi) gas hori mugikortasun eta logistika jasangarriaren mesedetan hedatzeari buruzko jardunaldia antolatu du, portuko garraio eta eragiketen etorkizuna eraldatzen ari den proiektu berritzailea ezagutzera emanez.
Alde batetik, Ibileko Miguel Palaciok gainetik azaldu zituen ibilgailuaren birkarga-prozesua eta honi atxikitako zailtasunak, hidrogeno-hornitegien hornidura-ahalmena leheneratzeko denbora kasu. Etorkizunera begira, Palaciok esan zuen hidrogenoa aireportura eta Bilboko portura eramango dela, portua bera eta interesatuta dauden enpresak hornitzeko. Datorren urteko azken hiruhilekoan hidrogeno-instalazioen “inaugurazio oldea” gertatuko dela iragarri zuen, hiru ibilgailu aldi berean kargatzeko ahalmenarekin, erregai sintetikoen instalazioaren inaugurazioaz gain. Horren harira, “aurtengo abendutik edo 2026ko urtarriletik aurrera”, behin-behineko hidrogeno-hornitegi mugikorra jarriko da martxan.
Tecnalia enpresako Iñaki Eguiak hidrogenoaren ekonomia (garraioa, biltegiratzea eta banaketa) ardatz duen OntzHi proiektua azaldu zuen. Proiektuak 2023az geroko lehen fasea amaitu du, eta orain bigarren faseari ekingo dio zeinbait erronka teknologikori aurre egiteko, H2k hainbat materialekin duen erreakzioa eta metaletan jarduteko mekanismoak kasu. Aztergai izango duten beste erronka bat biltegi eta hidroduktuetako iragazketak eta ihesak izango dira, galerak minimizatzeko, eta, gainera, biltegiratze-andelen jasangarritasuna eta lehiakortasuna ikertuko dira.
Jorge Segurak (CSP Iberian Terminal Bilbao) eta Oscar Sagredok (Ferro Maquinaria de Elevación) egun gasolioz elikatzen den RTG portu-garabi konbentzional batean retrofit bidez hidrogeno-sistema bat ezartzea helburu duen proiektua azaldu zuten. H2 Integra deritzon proiektu honek erregai-pila eta bateria ditu osagai. Hauek dira gainditu beharreko erronkak: birkarga-denborak, potentzia lortzea, retrofitaren kostua eta sistemaren iraunkortasuna.
Gainera, Petronorreko Alba Emission Free Energy konpainiako Asier Madariagak BH2C Hidrogenoaren Euskal Korridoreaz hitz egin zuen, baita eraginkortasunean, egungo unitateen aldaketan eta industria-proiektu berrietan oinarrituta 2050erako zero isurpen garbi lortzea xede duen estrategiaren bilakaeraz eta proiektuez ere. Elektrolizagailuak ere izan zituen mintzagai: Lehena, 2,5 MWekoa, martxan dago jadanik; 10 MWekoa Bilboko portuan eraikitzen ari da eta datorren urtearen amaieran inauguratuko da aurreikuspenei jarraiki. Azkenik, 100 MWeko beste elektrolizagailu bat dago, 2028rako aurreikusia, 347 milioi euroko inbertsioa tarteko.
Jardunaldiaren amaieran, hidrogenoz propultsatutako atoi-traktorea bisitatu zuten Bilboko portuko instalazioetan.
Iturria: Diario el canal
