Protio Power, Hidrogenoaren Euskal Korridoreko bazkide berria

Zuzendaritza Batzordearen azken bileran, Protio Power bazkide berriaren sarrera iragarri da, eta horrenbestez, Hidrogenoaren Euskal Korridoreak (BH2C) 74 bazkide ditu, 62 proiektuz osatutako zorroa barne. Protio Power 2021ean sortu eta egoitza Euskadin duen teknologia-enpresa espainiarra da, eta energia garbia sortzeko hidrogeno bidezko erregai-pilaren sistemen garapenean espezializatuta dago. Konpainiak 200 kWerainoko sistema modularrak diseinatu eta integratzen ditu, eta bi arlo nagusi ditu ardatz: aplikazio geldikorrak, ospitale, bulego, portu eta datu-zentroetarako babeseko energiaren edo energia jarraituaren sorkuntza kasu; eta mugikortasun astun eta espezializaturako soluzioak, traktore, drone, orga jasotzaile, garabi eta industria arloko bestelako ibilgailuei zuzendutakoak.

Bazkide berri honen eskutik, BH2Cri gehitu zaio STACKTRUCK proiektua, mugikortasun astuneko propultsio-sistemetarako, eta bereziki, logistikako eta industria-garraioko aplikazioetarako PEM motako erregai-pilaren teknologia propioa garatu eta baliozkotzea helburu duena.