Petronorrek hasiera eman dio Bilboko Portuan 10 MWeko elektrolizagailua eraikitzeko faseari
Petronor aurrera doa Bilboko Portuan instalatuko den 10 MWeko elektrolizagailua martxan jartzeko prozesuan. 44 milioi euroko inbertsioa tarteko, proiektua Petronor buru duen Basque Hydrogen elkartearen bitartez garatzen ari da, eta bazkide hauek ditu elektrolizagailuaren eraikuntza eta eragiketarako: EEE (% 24,5) eta Enagás Renovables (% 24,5). Elektrolizagailu honen horniketarako, lehiaketa bat zabaldu eta Sunfire enpresa alemaniarrari esleitu zaio, eta proiektuaren ingeniaritza Technip enpresak garatuko du, Repsoleko ingeniaritza-zuzendaritzak gainbegiratuta.
Elektrolizagailu honen helburu nagusia, Bilboko Portuan ere eraikitzen ari den eta Petronorrekin batera Aramco Europe bazkide duen erregai sintetikoen (E-Fuels) demo instalazioa hidrogeno eta oxigeno berriztagarriz hornitzea da. Era berean, hidrogeno berriztagarriaren soberakina Petronorri banatu ahal izango dio, Bilboko Portua eta findegia lotuko dituen hodi baten bidez, eta etorkizunean, portuaren inguruko beste industria-bezero batzuei hidrogenoa eta oxigenoa hornitzeko aukera aztertuko da.
Proiektua eraikuntza-fasean dago orain. Uda baino lehen, ekipoak Bilbora iritsi eta muntatzen hasiko dira, sei hilabete inguruko lana osatuz. 2026ko lehen seihilekoan instalazioa martxan jartzea aurreikusi da, instalazioa elikatzeko linea elektrikoa energizatzen amaitu ondoren.
Iturria: Petronor, Basque Hydrogen
