Calvera Hydrogenek Hydrogen Refuelling Test Unit bat garatu du hidrogeno-hornitegien funtzionamendu seguru eta eraginkorra baliozkotzeko
Calvera Hydrogenek hidrogeno-hornitegiak (HRS) zehaztasun profesionalarekin baliozkotzea xede duen Aletheia proiektua iragarri du. Berrikita arrakastaz egiaztatu den Hydrogen Refuelling Test Unit delakoa zerbitzu bezala erabilgarri egongo da Calvera Hydrogenen bezeroentzat.
Aletheia proiektua (aletheiak ‘egia’ esan nahi du greko zaharrean) hidrogeno-hornitegien funtzionamendu sakona zehaztasunez, malgutasunez eta segurtasun osoz ezagutzeko beharrari erantzunez sortu da. Proiektu honetan garatutako testatze-gailuak giltzarrizko informazioa ematen du ISO 19880-1 araua betetzeko, hornitegi bakoitzaren segurtasuna eta errendimendua bermatuz.
Calvera Hydrogenen Hydrogen Refuelling Test Unit delakoak 5,4 kg-ko hidrogeno-biltegiratzea du 700 bar-eko presioan, hiru zilindro independenterekin. Presioaren eta tenperaturaren etengabeko monitorizazioa eskaintzen du betetze-kurbak aztertzeko eta gehiegizko presioaren, gehiegizko tenperaturaren edo komunikazio-galeraren seinaleak simulatzeko. Gainera, emari-neurgailu kalibratua du hornitutako hidrogeno-fluxua egiaztatzeko, eta hezetasun-analizagailu bat araztasuna ziurtatzeko. Hidrogenoa berrerabiltzeko edo modu kontrolatuan haizatzeko aukera ere ematen du, prozesuaren erabateko segurtasuna bermatuz ihes-sentsoreen, alarmen eta aireztapen behartuaren laguntzaz.
Iturria: Calvera Hydrogen
