Senerrek eta Ayesak konputazio kuantikoa aplikatu dute hidrogenoaren sorkuntza optimizatzeko
Senerrek eta Ayesak kontzeptu-proba bat garatu dute soluzio kuantiko baten bitartez, elektrolisi-instalazioetan Senerren SenHy tresna digitalaren laguntzaz egiten diren simulazio operazionalak optimizatzeko. Soluzio horri esker, hidrogenoaren sorkuntzari lotutako prozesu guztiak simula daitezke algoritmo kuantikoen laguntzaz, energia elektrikoaren iturri desberdinen (eguzki-sorgailuak, sareari egindako energia-erosketa, baterietan egindako biltegiratzea) kudeaketatik elektrolisi-moduluen eragiketa eta kudeaketaraino, irteerako hidrogeno-emariaren doikuntza ere barne hartuta, eskariaren iragarpenarekin lerrokatu ahal izateko.
Proiektua Sener lankide duen IPCEI programaren digitalizazio-helburuei atxikita garatzen ari da, elektrolisi-teknologiak hobetu eta hidrogenoaren kostu nibelatua (LCOH) murrizteko, taldeak garatutako SenHy tresnaren laguntzaz. Elektrolisi-instalazioetarako simulazio operazionalerako tresna berritzaile honek elektrizitate-hornidurako profil desberdinak integratu ditu. Proiektua irailaren 25ean aurkeztuko da, Hidrogenoaren Euskal Korridorearen (BH2C) Ekoizpenaren arloko Bertikalaren VI. Topaketan.
SenHy tresnak garrantzi handiko erronka teknikoari aurre egin beharko dio: minuturo optimizazio multifisikoko arazo konplexu bat konpontzea, profil energetikoen uneko egoeran eta potentzialean oinarrituta eta instalazioko eragiketa-parametroen egoera aintzat hartuta. Kalkulu-tresna tradizionalen mugapenak kontuan hartuta, modeloa sinplifikatu behar izan da erantzun-denborak betetzeko. Prozesua bizkortu eta eredu multifisikoaren konplexutasuna ahalik eta gehien aprobetxatzeko, Senerrek kontzeptu-proba bat egin du, Aiesak emandako konputazio kuantikoko algoritmo batean oinarrituta. Lankidetza honi esker, arazoa modu sinplifikatuan konpondu ahal izan da, soluzio-kalitate berarekin eta hamar aldiz azkarrago, kasu konplexuagoak simulatzeko eta simulazioen zehaztasuna nabarmen hobetzeko aukera erraztuz.
Ikuspegi holistiko honek, logika kuantikoaren berezko eskalagarritasunarekin batera, instalazio barruko eragiketarako hobekuntza-proposamenak lortzeko aukera erraztu du, simulazio-denbora arras laburra erabiliz. Horrela, plangintza zehatza hedatu ahal izango da, orain arte erabilitako estrategia klasikoarekin (ez-kuantikoa) egin zitezkeen simulazioen aldietatik harago.
Iturria: Ayesa
