Sarrallek hidrogenoa tenperatura altuko berotze-prozesuetan integratzea xede duen Europako HyInHeat proiektuaren bilera batean parte hartu du
Sarrallek Constellium bazkideak Grenoblen (Frantzia) duen C-TEC I+G zentroan antolatutako HyInHeat proiektuaren beste bilera batean parte hartu du. Jardunaldiaren barruan, partzuergoaren ordezkariek C-TECeko instalazioak bisitatu eta demostratzailea jardunean ikusteko aukera izan zuten.
HyInHeat Europako funtsekin finantzatutako proiektua da, Europako 12 herrialdetako 30 bazkide dituena, eta energia-kontsumo handiko industrietako tenperatura altuko berotze-prozesuetan hidrogenoa erregaitzat integratzea du helburu, bereziki aluminioaren eta altzairuaren sektoreetan. Proiektu honekin, sektore horiek eragindako karbono dioxidoaren isurpenak murriztu nahi dira, ia prozesu-kate osoa hartzen duten hidrogeno-errekuntzako sistema eraginkorrak ezarriz.
Ekimenaren barruan, Sarrallek ArcelorMittalen instalazio batekin batera lan egingo du honen aurreberotze-labea egokitzeko, oxigenoa agente oxidatzailetzat eta hidrogenoa % 100ean erregaitzat erabilita funtzionatzeko gai izan dadin, izan ere, aire bidezko ekipoen ohiko funtzionamendutik oxikoerrekuntzarako trantsizioa egiteak erregaia % 10-50 bitartean aurrezteko aukera ematen du, ekipoaren egungo eragiketaren arabera. Gainera, aire bidezko errekuntzaren ordez oxierrekuntzarako trantsizioa egiteak beste abantaila garrantzitsu bat dakar: guztizko NOx isurpenen murrizketa potentziala.
Proiektuan zehar, Sarrallek eta ArcelorMittalek beharrezko ezaguerak lortuko dituzte hidrogeno bidezko errekuntzako teknologiak industrializatzeko industria siderurgikoko berotze-labeei begira, eta birberotze-labeen diseinuak egokitu ahal izango dituzte, % 100ean hidrogenoz funtziona dezaten. Gainera, HyInHeatek Europako gainerako bazkideekin indarrak batzeko aukera emango die, siderurgiaren sektorean hidrogenoa erregaitzat elkarrekin eta arrakastaz integratu ahal izateko.
Iturria: Sarralle
