Sarrallek altzairuaren ekoizpena deskarbonizatu nahi du erregai fosilen ordez hidrogenoa erabiliz
Sarralle buru duen H-Acero2 proiektuak Euskadiko sektore siderurgikoaren deskarbonizazioa bultzatzea du helburu, altzairua ekoizteko prozesuaren hainbat etapatan erregai fosilen ordez hidrogenoa energia-iturritzat erabiliz. Guztira 7,53 milioi euroko aurrekontua duela (2024-2026), proiektuak Arku Elektrikoko Labea (EAF), koilara bidezko aurreberoketa eta tundish delakoa, birberotzeko labeak eta oxiebaketari dagozkien erronka teknologiko nagusiak jorratuko ditu.
Lehen edizioaren arrakastan oinarrituta, H-Acero2 proiektuak EAFn hidrogenoa erabiltzeko aukera aztertu nahi du, DRI berdeak eta konbentzionalak ekipo horietan dituzten inplikazioak ulertzeaz gain. Horrekin batera, oxierrekuntzarako zein hidrogeno bidezko aire-errekuntzarako erregogorrak diseinatuko dira ekipo guztietarako. Proiektuan, oxiebaketa-instalazio bat egokituko da saiakuntzak probeta handiagoekin eta berotan egin ahal izateko. Azkenik, industrian hidrogenoa erabiltzeak dakarren ingurumen zein ekonomiaren gaineko inpaktuaren ebaluazioa egingo da.
Sarralle buru duen partzuergoak industriako eragile nagusiak bildu ditu: Sidenor, ArcelorMittal, Tubacex, Tubos Reunidos, Nutec, Kelsen, Insertec, Nippon Gases eta Global Factor. Ekimeneko partaideak dira, halaber, Tecnalia, Ceit, Tubacex I+D, Sidenor R+D eta ArcelorMittal Global R&D ikerketa-zentroak. H-Acero2 proiektua Hazitek 2024 programaren bidez finantzatu da, SPRI eta FEDER funtsen babespean, eta EBren Horizon Europe 2021-2027 delakoaren helburuekin lerrokatuta dago.
Iturria: Sarralle
