Irizarrek i6S Efficient Hydrogen autobusa baliozkotu du Repsol eta Calvera Hydrogenen lankidetzaz
Irizarrek hidrogeno bidezko Irizar i6S Efficient FCEV modeloa baliozkotu du distantzia luzeko eragiketetarako, Repsol eta Calvera Hydrogenen lankidetzaz egindako proba batean. Irizarren autobusak Calvera Hydrogenek fabrikatutako Repsolen hidrogeno-hornitegi eramangarrian hartu du erregaia, Zaragozako El Cisne 1 zerbitzugunean.
Landa-proba honen bidez, Irizar i6S Efficient hidrogeno bidezko autobusak 850 kilometroko autonomia frogatu du zero isurpeneko ibilbidea eginez. Repsoleko zerbitzugunean egindako erregai-hornidurari esker, hidrogenoa ibilgailuaren edukieraren % 100ean kargatzeko gaitasuna ere egiaztatu ahal izan da.
Hidrogeno bidezko Irizar i6S Efficient FCEV modeloak Espainiako 2024ko Autokarraren Saria jaso zuen Busworld Nazioarteko Azokan, Irizarrek sari hori jaso duen bederatzigarren aldia izanik. Ibilgailuak 1.000 kilometrorainoko autonomia du, eta 20 minutu inguruko gutxieneko karga-denborak. Irizarrek hidrogeno bidezko autobus honen osagai nagusien iraunkortasun handia nabarmendu du, izan ere, ibilgailuaren bizialdi osoan erabiltzeko moduan dauden bateriak ditu, baita 30.000 eragiketa-ordu ingururen ondoren mantentze-lanen beharra izango duen erregai-pila bat ere.
Iturria: Irizar
