H2SITEk EIC Acceleratorren finantzaketa lortu du Europako ipar-mendebaldeko portu batean amoniako-krakeatzaile bat instalatzeko
H2SITEk EIC Accelerator (European Innovation Council) programaren finantzaketa jaso du amoniakoa krakeatzeko unitate baten hedapen-proiekturako, bere klaseko lehena, egunean purutasun handiko hidrogeno-tona bat ekoizteko gaitasuna izango duena. Sistema H2SITEk patentatutako paladio-mintzez erreaktorearen teknologian oinarrituta dago, unitate bakar batean amoniakoaren deskonposizio katalitikoa eta aldi berean hidrogenoaren bereizketa selektiboa egiteko aukera eskaintzen baitu.
Euskal startupak garatutako teknologiak giltzarrizko abantailak eskaintzen ditu amoniakoa krakeatzeko prozesu konbentzionalen aldean.
- Amoniakotik hidrogenoa lortzearen (LCOH) kostu nibelatu txikiagoa, efizientzia handiaren eta diseinu integratuaren eraginez.
- Energia-kontsumo txikiagoa, tenperatura nabarmen baxuagoak (400-450 °C) behar baititu ohiko krakeo-metodoek (normalean 600-800 ° C) baino.
- Purutasun handiko hidrogenoaren ekoizpena, ISO 14687 arauaren D Graduaren arabera, erregai-piletan nahiz industria-aplikazioetan zuzenean erabiltzeko egokia.
- Diseinu konpaktu eta modularra, hidrogenoaren ekoizpen deszentralizatua errazten duena.
Amoniakoa krakeatzeko sistema demostrazio-instalaziotzat erabiliko da, H2SITEren mintz integratuko erreaktorearen ikuspuntuaren heldutasun teknologiko eta komertziala garrantzizko eskala industrialean baliozkotzeko asmoz, murrizketa zaileko sektoreen deskarbonizazioan aurrera egin ahal izateko.
Hidrogenoaren ekonomia garatu ahala, funtsezkoak izango dira hidrogenoa garraiatzeko karbono gutxiko soluzio eraginkorrak. Amoniakoa hidrogeno-eramaile egokia izan daiteke, bere energia-dentsitate bolumetriko handiagatik eta egun dauden azpiegiturengatik, izan ere, urtean 20 milioi tona amoniako baino gehiago garraiatzen dira itsasontziz. Amoniakoa krakeatzeko teknologian izandako aurrerapenek, H2SITEren mintzeko erreaktore integratua kasu, bide hau lehiakorra egiten lagunduko dute, hidrogenoa hornitzeko kate malguak eta eskala handikoak erraztuz.
Iturria: H2SITE
