Enagasek 4.035 milioi euro inbertituko ditu 2030era arte hidrogeno berdea hazkundearen zutabetzat hartuta
2025-2030eko Estrategiaren Eguneratzearen aurkezpenean, Enagasek 4.035 milioi euroko inbertsioa iragarri du datozen sei urteetarako, eta horietatik 3.125 milioi hidrogeno berriztagarriko azpiegiturak hedatzeko erabiliko ditu, EBITDAn urtean % 9,5eko hazkunde konposatua lortuz 2026tik 2030era bitartean.
Era berean, enpresak 2024ko emaitzak aurkeztu ditu, eta Europako H2med hidrogeno-korridorean egindako aurrerapenei eta Estatuko zein Europako hainbat lantalde eta berrikuntza-proiektutan izandako parte-hartzeari esker, urtea giltzarrizko izan da Enagasek hidrogenoaren sektorean duen etorkizunari dagokionez. Horren harira, Enagas hainbat elkartetako kidea da: GERG (European Research Group for Gas), Hidrogenoaren Espainiako Plataforma Teknologikoa, Hydrogen Europe eta Hidrógeno de Aragón Fundazioa, besteak beste.
Bestalde, konpainiak % 22,5 murriztu ditu CO2 isurpenak 2024an, deskarbonizazio-helburuak eta 2040an zero isurpeneko konpainia bihurtzeko konpromisoa betez.
2025-2030eko Estrategiaren Eguneratzearen bitartez, Enagás hidrogenoa oinarri nagusi duen hazkunde-etapa berri baterako prestatzen ari da. Enpresaren helburua hidrogeno-aktiboak areagotzea da, 2030erako gas naturalekoak baino handiagoak izan daitezen, trantsizio energetikoaren alde hartu duen konpromisoaren seinale. Hidrogenoa eta beste bektore garrantzitsu batzuk bultzatzeko, Enagasek Scale Green Energy delakoaren sorrera iragarri du, eta honen ardatz izango dira CO2 ekimenak, GNL nahiz bioGNLren bunkering eta small scale ekimenak, mugikortasunerako hidrogenoa eta amoniako berriztagarria.
