BH2Ck bideo bat kaleratu du hidrogenoaren euskal industriaren lorpenak eta proiektuak aurkezteko

Hidrogenoaren Euskal Korridoreak bideo bat argitaratu du, hidrogeno berriztagarriaren ekosistema bultzatu eta lurraldearen deskarbonizazioan aurrera egitea xede duen Euskadiko ekimen estrategikoa aurkezteko. 2021-2030 aldian, euskal enpresek sektorean 900 milioi euro inbertitu eta 132,5 MWeko elektrolisi-gaitasuna lortzea espero da. Bideoan, halaber, BH2Cko bazkideek izandako lorpen ugariak jaso dira, baita hidrogenoaren euskal balio-kate osoak egun abian dituen proiektuak ere, ekoizpenetik hasi eta industria zein mugikortasunaren arloetako amaierako erabileraraino.

Erakunde hauek parte hartu dute bideoan: Basque Hydrogen, Bureau Veritas, CAF, Calvera, Cidetec, Enagas Renovable, EEE, H2site, Ibil, Irizar, Nippon Gases, Nortegas, Petronor, Repsol, Sarralle, Sener, Talgo eta Tecnalia. Ekimenen artean, beren-beregi nabarmen daitezke Petronorren 10 MWeko eta 100 MWeko elektrolizagailuak, hidrogeno purua banatzea helburu duen Nortegasen gasbidea, Calvera Hydrogenek hidrogenoaren garraio eta horniketarako abian dituen soluzioak, H2Siteren paladio-mintzen lantegia, Irizar i6S hidrogeno bidezko autobusa eta Ibilek hidrogeno bidezko ibilgailuentzat garatutako birkarga-guneak, besteak beste.